Календары ад Hrodna.life са здымкамі старой Гародні

Календары ад Hrodna.life са здымкамі старой Гародні


Гарадзенскія журналісты, што працуюць на партале Hrodna.life, выдалі календары са здымкамі старой Гародні.

Пра адметнасць праекту распавядае адна са стваральніц – журналістка Ірына Новік:

– Мы выкарыстоўваем там фотаздымкі, якія рабіліся цягам года. У мінулым годзе адным з самых адметных нашых праектаў стала праца са сталымі гарадзенцамі. Наш журналіст Руслан Кулевіч збіраў успаміны пра 30-40-я гады жыцця ў Гародні. Таму наш настольны каляндар ілюстраваны фотаздымкамі з асабістых архіваў нашых герояў.

На насценным календары выкарыстаны здымкі вядомай гарадзенскай фатографкі Наталлі Дораш. Пра тое, чаму быў зроблены такі выбар, кажа Ірына Новік:

– Мы выкарысталі тую нагоду, што 2019 год будзе годам Свінні. На адной з выставаў Наталлі Дораш, прысвечанай таксама мінуўшчыне нашага горада, мы заўважылі фотачку са свіннёй. Наталля распавяла цікавую гісторыю, што гэтую свінню яна сустрэла на Савецкай вуліцы, і адзін вельмі пільны грамадзянін стараўся яе спыніць, калі яна фатаграфавала. Прычынай было жаданне прыпыніць ачарненне савецкай рэчаіснасці.

Ужо цягам бліжэйшых дзён календары будуць накіраваныя падпішчыкам Hrodna.life, а таксама ўладам горада, у тэатры, на выставы ды іншыя культурныя пляцоўкі горада.

Беларускае Радыё Рацыя, Гародня

Крыніца: Беларускае Радыё Рацыя